Pawan Kalyan : ತಿರುಪತಿ ತಿರುಮಲ ದೇವಸ್ಥಾನದಲ್ಲಿ (Tirupati Tirumala Temple) ಭಕ್ತರಿಗೆ ನೀಡುತ್ತಿದ್ದ ಲಡ್ಟು ಪ್ರಸಾದದಲ್ಲಿ ಪ್ರಾಣಿಗಳ ಕೊಬ್ಬು ಮತ್ತು ಮೀನಿನ ಎಣ್ಣೆ ಇದೆ ಎಂಬುದು ವರದಿಗಳಿಂದ ದೃಢವಾಗಿದ್ದು ಇದು ದೇಶದೆಲ್ಲೆಡೆ ಸಂಚಲನ ಸೃಷ್ಟಿಸಿದೆ. ಇವೆಲ್ಲವುಗಳ ನಡುವೆ ತಮಿಳು ಸಿನಿಮಾ ಕಾರ್ಯಕ್ರಮವೊಂದರಲ್ಲಿ ಲಡ್ಡು ವಿಚಾರವಾಗಿ ಮಾತನಾಡಿದ ನಟ ಕಾರ್ತಿ ಮೇಲೆ ಪವನ್ ಕಲ್ಯಾಣ್ ಗುಡುಗಿದ್ದಾರೆ.
ಸಿನಿಮಾ ಕಾರ್ಯಕ್ರಮವೊಂದರಲ್ಲಿ ನಿರೂಪಕಿಯು ಕಾರ್ತಿ (Karthi) ಅವರಿಗೆ ಲಡ್ಡು ಬೇಕಾ ಎಂದು ಜಾಹೀರಾತಿನ ಡೈಲಾಗ್ ಹೇಳಿ ತಮಾಷೆ ಮಾಡಿದ್ದು, ಇದಕ್ಕೆ ಕಾರ್ತಿ ಲಡ್ಡು ವಿಷಯ ಈಗ ಬೇಡ, ಅದು ಬಹಳ ಸೆನ್ಸಿಟಿವ್ ವಿಷಯ ಆಗಿದೆ ಎಂದು ನಕ್ಕಿದ್ದು, ಆಗ ನಿರೂಪಕಿ ನಿಮಗಾಗಿ ಮೋತಿಚೂರ್ ಲಡ್ಡು ತರಿಸಿ ಕೊಡುತ್ತೇವೆ ಎನ್ನುತ್ತಾರೆ. ಆಗ ಕಾರ್ತಿ ಈಗ ಲಡ್ಡು ಬೇಡ, ಬೇಡ ಎಂದು ನಗುತ್ತಾ ಹೇಳಿದ್ದಾರೆ.
ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ಪವನ್ ಕಲ್ಯಾಣ್ (Pawan Kalyan), ನಿನ್ನೆಯ ಸಿನಿಮಾ ಸಮಾರಂಭದಲ್ಲಿ ಲಡ್ಡು ಹೇಗೆ ಸೂಕ್ಷ್ಮ ವಿಷಯವಾಗಿದೆ ಎಂದು ತಮಾಷೆ ಮಾಡುವುದನ್ನು ನಾನು ನೋಡಿದೆ. ನೀವು ಅದನ್ನು ಎಂದಿಗೂ ಹೇಳಬೇಡಿ. ದಯವಿಟ್ಟು ನೀವು ಎಂದಿಗೂ ಹೇಳುವ ಧೈರ್ಯ ಮಾಡಬೇಡಿ. ನಾನು ನಿಮ್ಮನ್ನು ನಟರಾಗಿ ಗೌರವಿಸುತ್ತೇನೆ,
ಆದರೆ ಸನಾತನ ಧರ್ಮದ ವಿಷಯಕ್ಕೆ ಬಂದಾಗ, ದಯವಿಟ್ಟು ಒಂದು ಮಾತು ಹೇಳುವ ಮೊದಲು ನೀವು ನೂರು ಬಾರಿ ಯೋಚಿಸಿ ಮಾತನಾಡಿ ಎಂದು ಕಾರ್ತಿಗೆ ಎಚ್ಚರಿಕೆ ನೀಡಿದ್ದಾರೆ. ಪವನ್ ಕಲ್ಯಾಣ್ ಗರಂ ಆದ ಕೂಡಲೇ ನಟ ಕಾರ್ತಿ ಸಹಾ ಒಂದು ಟ್ವೀಟ್ ಮಾಡುವ ಮೂಲಕ ಕ್ಷಮೆಯನ್ನು ಕೇಳಿದ್ದಾರೆ.
ಕಾರ್ತಿ ತಮ್ಮ ಟ್ವೀಟ್ ನಲ್ಲಿ, ಪ್ರೀತಿಯ ಪವನ್ ಕಲ್ಯಾಣ್ ಅವರೇ ನಿಮ್ಮ ಬಗ್ಗೆ ನನಗೆ ಅತೀವವಾದ ಗೌರವ ಇಷೆ. ಉದ್ದೇಶಪೂರ್ವಕವಲ್ಲದೇ ನಡೆದ ಘಟನೆಗಾಗಿ ಕ್ಷಮೆಯನ್ನು ಕೇಳುತ್ತೇನೆ. ನಾನೊಬ್ಬ ವೆಂಕಟೇಶ್ವರನ ಭಕ್ತನಾಗಿ ಸಂಪ್ರದಾಯವನ್ನು ಆಚರಿಸುತ್ತೇನೆಂದು ಎಕ್ಸ್ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ.
