Anushka Shetty : ದಕ್ಷಿಣದ ಸ್ಟಾರ್ ನಟಿ ಅನುಷ್ಕಾ ಶೆಟ್ಟಿ ಇತ್ತೀಚಿನ ವರ್ಷಗಳಲ್ಲಿ ಹೆಚ್ಚು ಸಿನಿಮಾಗಳಲ್ಲಿ ನಟಿಸುತ್ತಿಲ್ಲ. ಆದರೂ ಆಗೊಮ್ಮೆ ಈಗೊಮ್ಮೆ ಸಿನಿಮಾದಲ್ಲಿ ಕಾಣಿಸಿಕೊಂಡು ನಟಿ ಅಭಿಮಾನಿಗಳಿಗೆ ಖುಷಿಯನ್ನು ನೀಡುತ್ತಿರುತ್ತಾರೆ. ಇಂದು ನಟಿ ಅನುಷ್ಕಾ ಶೆಟ್ಟಿ (Anushka Shetty) ಅವರ ಜನ್ಮದಿನ. ಈ ವಿಶೇಷ ದಿನದಂದು ನಟಿಯ ಹೊಸ ಸಿನಿಮಾಕ್ಕಾಗಿ ಕಾಯುತ್ತಿದ್ದ ಅವರ ಅಭಿಮಾನಿಗಳಿಗೆ ಹೊಸ ಅಪ್ಡೇಟ್ ಒಂದು ಸಿಕ್ಕಿದ್ದು, ಅಭಿಮಾನಿಗಳು ಖುಷಿಯಾಗಿದ್ದಾರೆ.
ಅನುಷ್ಕಾ ಶೆಟ್ಟಿ ಅವರು ಒಂದು ವಿಭಿನ್ನ ಗೆಟಪ್‌ನಲ್ಲಿ ಕಾಣಿಸಿಕೊಂಡಿರುವ ಹೊಸ ಸಿನಿಮಾದ ಲುಕ್ ಅನ್ನು ಚಿತ್ರತಂಡ ರಿವೀಲ್ ಮಾಡಿದ್ದು ಸಿನಿ ಪ್ರೇಮಿಗಳು ಮತ್ತು ಅಭಿಮಾನಿಗಳು ಇದನ್ನ ನೋಡಿ ಖುಷಿಯಾಗಿದ್ದಾರೆ. ಫ್ಯಾನ್ಸ್ ಗೆ ಡಬಲ್ ಧಮಾಕ ಎನ್ನುವಂತೆ ಎರಡು ಸಿನಿಮಾಗಳ ಪೋಸ್ಟರ್ ಗಳನ್ನು ಚಿತ್ರ ತಂಡ ಬಿಡುಗಡೆ ಮಾಡಿದೆ. ಅವುಗಳಲ್ಲಿ ಈಗಾಗಲೇ ಸಾಕಷ್ಟು ಕುತೂಹಲವನ್ನು ಕೆರಳಿಸಿರುವ ಘಾಟಿ (Ghaati) ಸಿನಿಮಾದ ಪೋಸ್ಟರ್ ಸಹಾ ಒಂದಾಗಿದೆ.
ಪೋಸ್ಟರ್ ನಲ್ಲಿ ಅನುಷ್ಕಾ ಲುಕ್ ರೋಚಕತೆಯನ್ನು ಕೆರಳಿಸಿದೆ. ರಕ್ತ ಮೆತ್ತಿದ ಕೈಗಳಲ್ಲಿ ಚುಟ್ಟಾ ಸೇದುತ್ತಿರುವ ಖಡಕ್ ಲುಕ್ ನಲ್ಲಿ ಅನುಷ್ಕಾ ಕಾಣಿಸಿಕೊಂಡಿದ್ದಾರೆ. ಈ ಪೋಸ್ಟರ್ ನೋಡಿದವರಿಗೆ ಅನುಷ್ಕಾ ಅವರು ಈ ಮೊದಲು ನಟಿಸಿರುವಂತಹ ಅರುಂಧತಿ ಮತ್ತು ಭಾಗಮತಿ ಸಿನಿಮಾಗಳ ಪಾತ್ರಗಳ ಚಿತ್ರಣ ಒಂದು ಸಲ ಕಣ್ಮುಂದೆ ಸರಿದು ಹೋದಂತಹ ಅನುಭೂತಿಯನ್ನು ನೀಡುತ್ತಿದೆ.
ಘಾಟಿ ಸಿನಿಮಾದ ಜೊತೆಗೆ ನಟಿ ಮಲೆಯಾಳಂ ನಲ್ಲಿ ನಟಿಸುತ್ತಿರುವ ಕಾತನಾರ್ (Katanaar) ಸಿನಿಮಾದ ಪೋಸ್ಟರ್ ಕೂಡಾ ಬಿಡುಗಡೆ ಆಗಿದೆ. ನೀಲ ಎನ್ನುವ ಪಾತ್ರದಲ್ಲಿ ನಟಿ ಕಾಣಿಸಿಕೊಳ್ಳುತ್ತಿದ್ದು ಇದೊಂದು ಆತ್ಮದ ಕಥೆ ಎನ್ನಲಾಗಿದೆ. ನಟಿಯ ಜನ್ಮದಿನಕ್ಕೆ ಅನಾವರಣ ಆದ ಎರಡು ಸಿನಿಮಾಗಳಲ್ಲಿನ ನಟಿಯ ಡಿಫರೆಂಟ್ ಲುಕ್ ಈಗ ಎಲ್ಲರ ಗಮನವನ್ನು ಸೆಳೆಯುತ್ತಿದ್ದು, ಅಭಿಮಾನಿಗಳು ಥ್ರಿಲ್ ಆಗಿದ್ದಾರೆ.
